Kaj Leo Holm Johannesen: Trýstið riggar

"Vit politikarar hava ikki gjørt nóg mikið fyri tey við skerdum førleikum."

Tað ásannar Kaj Leo Holm Johannesen, nú hann sjálvur situr í koyristóli.

Hann er farin frá at taka politiskar avgerðir til at vera ein av teimum, ið leggur trýst á skipanina -  og tað hevur riggað, steðfestur borgarstjórin í Runavíkar kommunu. 

"Tað, sum Kaj Leo hevur fortalt um alment um sína støðu, hevur ávirkað meg øgiliga nógv," sigur Tórbjørn Jacobsen, borgarstjóri í Runavikar kommunu, sum tí hevur tikið atkomuviðurskiftini hjá teimum við skerdum førleikum til eftirtektar, nú kommunan hevur umvælt vesini við fótbóltvøllin á Skála. 

"Mann heldur kanska, at tað er eitt lítið ting, tá man gongur uppreistur. Men fyri okkum koyrristólsbrúkarar, so er hetta ræðuliga stórt. Eg eri so ræðuliga glaður", sigur Kaj Leo Holm Johannesen. 

Fyrrverandi løgmaðurin hevur fleiri ferðir alment tosað um, hvussu gerandisdagurin hjá sær er broyttur.

LES EISINI:  
Koyristólurin læt eyguni upp
Vil skipa fyri stevnu fyri koyristólsbrúkarar 
Eg vil stríðast, so tað verður betur

Kaj Leo Holm Johannesen hevur verið løgtingsmaður, landsstýrismaður og løgmaður. Hetta ger at fólk lurta, tá hann ger vart við nakað. Tað ásanna bæði borgarstjórin í Runavíkar kommunu og fyrrverandi løgmaðurin sjálvur.

"Nógv siga við meg, at tey hava sagt tað sama, sum eg sigi, í 10 ár, men eingin hevur lurtað. 'Nú sigur tú tað, so lurta øll,'" greiðir hann frá.

Kortini er Kaj Leo Holm Johannesen fegin um at gera mun fyri tey við skerdum førleikum.