Vit vóru ikki klárar frá byrjan

Kyndil vann trygt á VÍF í fyrstu FM-finaluni á Hálsi í Havn.

Heimaliðið var frammanfyri við tveimum málum, 29-27, tá klokkan rakti tíman, men leiðslan var heilt uppi á seks málum onkra løtu, og sigurin var ikki í vanda.

Men spælið hjá Kyndli var ikki sannførandi fyri steðgin, tá VÍF var ágangandi og hekk í.

 - Vit vóru ikki heilt klárar frá byrjan. Tær komu við nógvari ferð, og vit blivu tiknar á bóli, segði Silja Geirsdóttir Eystberg eftir dystin.

Kyndil fekk trý tey síðstu málini fyri steðgin og fóru í skiftirúmið frammanfyri 16-13, og í seinna hálvleiki fingu tær grønu meir ferð á.

Turið Arge Samuelsen skoraði átta av sínum 12 málum eftir steðgin, og munurin kom upp á seks mál, áðrenn hann tódnaði niður aftur í tvey til endans.

 - Nú eru vónandi tveir dystir eftir, og nú skulu vit bara vera klárar til næsta dyst, segði Silja Geirsdóttir Eystberg, sum skeyt fimm mál fyri Kyndil.

Onnur FM-finalan verður spæld í Vestmanna mikukvøldið.