Kyndil stríddi seg framvið treisku vestmenningunum í fyrstu FM-finaluni

Kyndil vann við tveimum málum ímóti VÍF í fyrstu FM-finaluni í SMS-deildini í høllini á Hálsi sunnudagin.

Munurin var seks í løtum í seinna hálvleiki, og tí var sigurin tryggari enn endaliga úrslitið ber boð um, men tað tók sína tíð hjá Kyndli at sleppa undan treisku vestmenningunum. 

Eina løtu í fyrra hálvleiki var VÍF frammanfyri við einum, áðrenn Kyndi javnaði og fór trý framum beint fyri steðgin.

Síðstu 10 minuttirnar av dystinum skifti Kyndil nógv út, meðan vestmenningar noktaðu at seta ferðina niður, og tí endaði dysturin 29-27.

Høllin á Hálsi (SMS-deildin, 1. FM-finalan)

Kyndil - VÍF, 29-27 (16-13)

Toppskjúttar, Kyndil: Turið Arge Samuelsen 12, Bára Krossteig Hansen 6, Silja Geirsdóttir Eystberg 5

Toppskjúttar, VÍF: Fríða Nolsøe Olsen 8, Durita Christophersen Jojic 4, Lív Sveinbjørnsdóttir Poulsen 3, Liljan Muller 3