Nýggja føðideildin fingið eina flúgvandi byrjan

Við klipp av snóri, røðum og tónleiki, varð nýggja føðideildin í H-bygninginum hátíðarhildin í dag.

Men meðan móttøkan var, so var gerandisdagurin longu byrjaður. Tvær av trimum føðistovum vóru upptiknar, tá Kringvarpið varð víst runt. Og stutt eftir bleiv eisini tann triðja tikin í brúk.

Við flytingini verður eitt langt tíðarskeið á Landssjúkrahúsinum samstundis lagt afturum.

Føðideildin hevur higartil hildið til í A-bygninginum, sum læt upp í 1924, sum tá æt Dronning Alexandrines Hospital.

Men nú er føðideildin flutt í H-bygningin, har umstøðurnar eru lagaðar til nútíðar krøv við nýggjari tøkni, nýggjum føðistovum og eisini einastovum.