Porkeri hevur eins og restin av Suðuroynni kent sviðan av umfatandi arbeiðsloysinum har suðuri seinastu árini. Fólkatalið í bygdini hevur verið støðugt minkandi sum avleiðing av stóru fráflytingini úr oynni, og enn røkist lítið og onki fyri nakrari broyting. Kortini tykjast porkenningar sum heild at hava eina vón um, at aldargamla bygd teirra aftur fer at menna seg sum frálíður. Fyritreytin fyri hesum er tó, at fleiri arbeiðspláss verða útvegað í bygdini, og at oyggin verður skipað sum ein kommuna. Á vitjan okkara í hesi snøggu og hugnaligu bygdini hitta vit ein hóp av fyrikomandi og fryntligum porkenningum, ungum sum gomlum, - og sjálvandi eru vit eisini við, tá onkur av teimum tiltiknu stóru og feitu veðrunum verður flettur. Er tað nakað, Porkeri er kent fyri, ja, so er tað júst veðrahald. Lagt til rættis: Leivur Hansen og Zacharias Hammer.