- Tíðindi, mentan og ítróttur
Árið, ið fer
![](https://kvf.fo/sites/default/files/styles/news_xtra_xtra_large/public/592152f24110fbc16438d12d5194b1c4.png?itok=jZLMgGBJ)
Vit hyggja aftur á nøkur av málunum, sum merktu farandi árið. Við aktuellum gestum líta vit aftur á málini, seta tey í perspektiv og hyggja inn í 2015.
Í sendingini viðgera vit hesi evni:
-Altjóða oljufeløgini brúktu milliardir á føroyska landgrunninum í leitanini eftir svarta gullinum.
-Á landi gjørdu myndugleikarnir alt fyri at sleppa undan oljuni, og við vindmyllulundini í Húsahaganum kom føroyska samfelagið eitt stórt fet nærri grøna málinum.
-Ferðavinnan fekk vind í seglini í 2014. Somikið nógvan vind, at málsetningurin fyri 2015 varð rokkin - longu í 2014.
-2014 var árið, tá vit sóu størsta átakið hjá einum djóraverndarfelagsskapi - framt á føroyskari jørð og á føroyskum hvalvágum.
-Harðskapurin gjørdist harðligari - farandi árið upplivdu vit fleiri drápsmál og rán.
-Á politiska pallinum var eisini harðligt viðhvørt. Ikki minni enn tvær ferðir skuldi ein landsstýrismaður vigast á politisku vektini, tí andstøðan reisti misálit.
-Uttanríkispolitiskt gjørdu Føroyar semju um nógv umstrídda makrelfiskiskapin - ein semja, sum bæði gav Føroyum nógv meira í sín part, og tók burtur ES-boykottið á føroyskan makrel og sild. Í heyst komu Føroyar inn í russiska hitan, tá tað av stórpolitiskum ávum kølnaði millum Russland og evropeiska samveldið.
-Fiskivinnupolitiskt skuldi farandi árið setast ferð á eina nýskipan av okkara fiskivinnu. Samstundis reistu málið um garnaskipið Anitu og ein niðurstøða hjá Umboðsmanninum spurningar, ið stinga djúpt inn í fiskivinnuna.
-2014 var árið, tá ein kanningarstjóri fór at endavenda politisku avgerðirnar kring privatu ætlanina við Eysturoyartunlinum.
-Á midnátt varð eldraøkið flutt frá landi til kommunurnar at umsita.
Gestir í sendingini eru: Hans Gammeltoft-Hansen, Jan Múller, Kári Mortensen, Guðrið Højgaard, Anfinn Olsen, Kjartan Hoydal, Karin Kjølbro, Árni Gregersen, Sveinur Tróndarson, Jacob Vestergaard, Páll Holm Johannesen, Marita Rasmussen, Eyðun Christiansen, Sverri Hansen.
Tak niður
Sí eisini