Jólagávur: Heimagjørt ella innflutt

Vit innflyta hvørji jól fyri fleiri milliardir úr eitt nú Kina. Vit vilja hava. Tað er einki nýtt, at økti innflutningurin til okkara part av heiminum, elvir til stórar altjóða trupulleikar. Menniskju arbeiða undir neyðarsligum korum, og náttúran má lúta fyri okkara krøvum; Vit vilja hava tað bíligt her og nú.

"Hetta eiga vit at hugsa um, tá vit geva jólagávur", sigur Elin Lindenskov, sum er hondarbeiðslærari og eisini býráðslimur í Tórshavnar kommunu, har hon hevur arbeitt nógv við umhvørvi og endurnýtslu.

Hvørt ár ger Elin Lindenskov heimagjørdar jólagávur til síni, og nú vil hon læra lurtarunum hjá okkum at gera tríggjar skjótar jólagávur. 

Tríggjar gávur upp á 30 minuttir

Hárprýði til eina gummudóttir. Køkslappar til vinkonuna. Og eina notubók, sum kann gevast til ein og hvønn. 

Hesi vóru uppskotini hjá Elini Lindenskov, tá Góðan Morgun Føroyar bað hana um hjálp at gera heimagjørdar jólagávur. 

"Eg brúki mestsum bara endurnýtt tilfar, tá eg seymi", fortelur Elin Lindenskov. Hárprýðið er úr eini gamlari troyggju, køkslapparnir úr einum gomlum handklæði og notubókin er gjørd úr pappírsrestum frá Steinprenti.