Vilja leggja almennar stovnar út á bygd

Landsstýrið skal kanna, hvørjar stovnar til ber at flyta úr Havnini. Tað halda andstøðutingmenninir Bill Justinussen, Kári P. Højgaard og Magnus Rasmussen, sum eiga uppskotið, og tað heldur rættarnevndin eisini. Ein samd rættarnevnd tekur undir við uppskotinum

Ætlanin er ikki at leggja allar almennar stovnar uttanfyri Havnina - bara at kanna hvussu man skilabest kann flyta nakrar út um Havnina, sigur Bill Justinussen.

Borgarstjórin í Havn, Annika Olsen, heldur at tað er eitt vánaligt hugskot, sum sýnir óbúnan politiskan hugsunarhátt.

Køkubitarnir verða fluttir eittsindur runt, men køkan verður ikki størra á hendan hátt, sigur borgarstjórin í Havn, sum heldur at vit heldur eiga at standa saman um høvuðsstaðin sum er í vøkstri, so hann kann kappast við aðrar høvuðsstaðir.

Ein samd rættarnevnd tekur undir við uppskotinum hjá Bill Justinussen, Kára P Højgaard og Magnus Rasmussen. Í rættarnevndini sita Kristin Michelsen, Magnus Rasmussen, Sonja Jógvnasdóttir, Ruth Vang, Ingolf Olsen, Edmund Joensen og Elsebeth Mercedes Gunnleygsdóttir.