Stórur áhugi fyri valluttøku

Val er í Russlandi í dag. Sitandi forsetin, Vladimir Putin, verður eftir øllum at døma valdur forseti fyri fjórðu ferð.

Valhølini í stóra landinum lata upp ymiskar tíðir á degnum. Eystast í landinum lótu fyrstu valhølini upp í gjárkvøldið, klokkan átta okkara tíð, og um sekstíðina í kvøld okkara tíð lata seinastu valhølini aftur.

Av tí at tað longu er greitt, at Vladimir Putin heldur fram sum forseti, er úrslitið av valinum ikki nakað, sum hevur áhuga millum fólk.

- Tað er stórur spenningur um sjálva valluttøkuna, sigur Bjørn Kunoy, sum er føroyskur sendimaður í Moskva, og heldur fram:

- Ein høg valluttøka tryggjar Putin eitt gott umdømi og eftirmæli, meðan ein lág valluttøka kann tulkast beint øvugt, sigur Bjørn Kunoy.