Viðgerð fyri afturlætnum hurðum

Borgarar í Klaksvík og onnur áhugað sleppa ikki at síggja sáttmálan millum kommununa og Bakkafrost um landstøðina, sum skal vera á Vestaru Bryggju í Klaksvík, fyrr enn hann er undirskrivaður.
Býráðið samtykti sáttmálan á afturlatnum fundi mikukvøldið.

Jógvan Skorheim, borgarstjóri í Klaksvík sigur, at samráðingarnar við Bakkafrost eru ikki heilt lidnar enn. Tá tær eru lidnar, fær almenningurin innlit í sáttmálan.

Kringvarpið skilir, at eitt týðandi punkt, sum partarnir samráðast um, er hvussu nógv Bakkafrost skal gjalda fyri at ein partur av keiini verður stongdur av.

Klaksvíkar kommuna hevur takstir fyri, hvat tað kostar at leiga øki á keiini, men tá talan er um at hegna ein part av økinum av, eru serlig viðurskifti, sum gera seg galdandi.

Millum annað skal kommunan meta um, hvørt hon fer at missa inntøkur av at hesin parturin av keikantinum verður stongdur - og í so fall, hvussu nógv hon missur.