Orka noyðist at broyta útbjóðing í tólvta tíma

-Hóast vit eru myndugleikin á økinum, so hava vit ongan annan møguleika enn at broyta útbjóðingina.

Tað sigur Ari Johanneson, sum umsitur elveitingarmál á Orkudeildini á Umhvørvisstovuni.

Útboðið av vindmyllulundini í Porkerishaganum er tódnað niður í helvt, úr 12 megawatt niður í seks metawatt, í tólvta tíma áðrenn freistin at bjóða er úti 1. mars.

Hóast pumpuskipanin er ein grundleggjandi fortreyt fyri stóru vindmyllulundini í Porkerishaga, so fekk myndugleikin einki at vita um, at SEV hevur slept hesi ætlan í fyrsta umfari. Ikki fyrr enn 1. februar fekk Orkudeildin á Umhvørvisstovuni boðini frá SEV, sum segði at pumpuskipanin varð slept fyribils.

Í skrivinum til Orkudeildina á Umhvørvisstovuna, dagfest 1. februar, vísir SEV á, at kostnaðurin fyri pumpuskipanina er tvífaldaður í mun til upprunaligu verkætlanina - prísurin er farin úr 90-100 milliónum upp í 180 milliónir krónur.

Í svarskrivi til SEV, dagfest 20. februar, sigur Orka seg ikki taka undir við avgerðini hjá SEV um at steðga á við pumpuskipanini.

Ari Johannesen vísir á, at SEV søkti um loyvi at fara undir ítøkiligu pumpuskipanina 22.mars í 2017. Og henda pumpuskipan er seinni blivin grundleggjandi partur í útbjóðingini av vindmyllulundini - júst tí at vindorkan skal brúkast pumpuskipanina.

Sambært Orku fer útbyggingin í Suðuroynni, við vindmyllum og pumpuskipan, at flyta Suðuroynna frá at vera umleið 10 prosent grøn til at vera umleið 80 prosent grøn. Og til ber at spara 5.000 tons av tungolju um árið á elverkinum í Vági, sigur Orka.

Hoyr samrøðu við Ari Johanneson við at trýsta á pílin undir myndini