Føroyar hava egin áhugamál í Arktis

26.02.2020 - 18:01
Aktuelt
Føroyar hava egin áhugamál í Arktis
Og tað skal síggjast í nýggju strategiini hjá ríkisfelagsskapinum, sigur løgmaður

Tak niður

Danmark, Føroyar og Grønland hava ikki eitt felags útgangsstøði til samstarvið í Arktis. Tí er tað týdningarmikið, at framtíðar arktiska strategiin virðir, at londini hava ymisk áhugamál og raðfestingar.

Tað er boðskapurin í eini kjakíkasti, ið Bárður á Steig Nielsen, løgmaður, hevur skrivað til danska miðilin altinget.dk.

Kjakíkastið kemur í kjalarvørrinum av, at ferð av álvara er sett á arbeiðið at gera eina felags arktiska strategi fyri allan ríkisfelagsskapin. Hol er sett á arbeiðið í samband við at núverandi strategiin, ið bleiv orðað í 2011, endar í ár.

Fundur verður hildin í Illulisat í Grønlandi um ein mánaða, har politikkarar úr øllum trimum londum koma saman at tosa um nýggja arktiska politikkin.

Og tað er eitt arbeiðið, ið sambært løgmanni, kemur í tøkum tíma, tí trýstið frá útlendskum stórveldum sum USA, Russland og Kina á tey arktisku londini veksur í heilum.

Í kjakíkastinum vísir løgmaður millum annað á ynskið hjá føroyingum, um at fáa meira innlit og ávirkan á uttanríkis, trygdar- og verjumál, ið eru viðkomandi fyri Føroyar.

- Uttan hetta innlit og ávirkan hava vit ikki møguleika fyri at røkja okkara áhugamál sum ein partur av heimssamfelagnum og sjálvandi eisini Arktis, skrivar løgmaður.

Umframt at brúka arbeiðið við nýggju strategiini fyri at fáa innlit og ávirkan á politiska økið, ger løgmaður eisini greitt, at fokusið hjá føroyiongum í arktiska økinum fyrst og fremst er knýtt at fíggjarligum áhugamálum.

- Kjarnin í arktisku strategiini hjá Føroyum er ítøkilig og fokuserað. Okkara lyklastøða í Arktis gevur okkum ein møguleika, ið ikki hevur sítt fordømi, at fáa til vega nýtt fíggjarligt virksemi. Heilt ítøkiligt ynskja vit at fáa mest møguligt burturúr teimum fíggjarligu møguleikum innan sigling, grøna orku og ferðavinnu, skrivar løgmaður.

Jens Christian Svabo Justinussen, ph.d. í samfelagsvísind, var í útvarpsstovuni og greiddi frá um geopolitisku støðuna í Arktis og Bárður á Steig Nielsen, løgmaður, greiddi frá um samstarvið við danir og grønlendingar um nýggju strategiina.   
 

 
 
Nýggjastu sendingar í ÚV
Mikudag 8. apríl
Stór óvissa eftir tíðindafundirnar
107530
Mikudag 8. apríl
Áðrenn Elvis 080420
107528
Mikudag 8. apríl
Góðan morgun Føroyar, 6. apríl 2020
107525
Mikudag 8. apríl
Góðan morgun Føroyar, 7. apríl 2020
107522
Mikudag 8. apríl
Góðan morgun Føroyar, 8. apríl 2020
107523
Nýggjastu sendingar í SV
Týsdag 7. apríl
Úr savninum: Kanska um hundrað ár 3:4
107487
Týsdag 7. apríl
Úr savninum: Slóðarar 1:7
107421
Týsdag 7. apríl
Drúgt sjónvarp
107332
Mánadag 6. apríl
Úr savninum: Kennir tú land títt? (2:3)
107297