Smyril Line væntar hall í ár

Góða gongdin hjá Smyril Line, við vaksandi yvirskoti tey síðstu árini, er helst av.

- Vit fara helst at hava hall í hesum roknskaparárinum.

Tað ásannar Rúni Vang Poulsen, stjóri í Smyril Line, nú felagið hevur mist tíggjutals milliónir í inntøkum síðstu vikurnar.

Avlop í fjør

Avlopið hjá Smyril Line var í fjør 75 milliónir krónur.

Felagið rindar ikki vinningsbýti fyri 2019, hóast úrslitið í fjør var so gott, kunngjørdi felagið herfyri.

Teir partar av Smyril Line-samtakinum, sum hava verið hart raktir av stongslinum síðstu vikurnar, hava brúkt serskipanirnar hjá ALS, har fólk eru send heim hálva ella fulla tíð.