Fólkini hava tað gott

Eldur kom í ein bil inni í Árnafjarðartunlinum um hálvgum níggju tíðina í kvøld. Nógvur roykur stóðst av eldsbrunanum.

Tvey vaksin og fýra børn vóru í bilinum. Tey vóru øll flutt úr tunlinum í øllum góðum við einum øðrum bili, sigur Hendrik Akurstein, sløkkiliðsmaður, sum var staddur norðarumegin Árnafjarðartunnilin.

Runnu undan roykinum

Børnini vóru fyrst flutt burtur frá vandanum í einum bili, og tá bilførarin fór inn aftur í tunnilin eftir foreldrunum, høvdu tey runnið undan nógva roykinum.

Foreldrini runnu einar 150 metrar móti tunnilsmunnanum, metir sløkkiliðsmaðurin.

– Ongin teirra er farin á sjúkrahús, og øll hava tað eftir umstøðunum gott, sigur hann.

Landsverk kannar tunnilin

Nógv stórt og leyst grót er uppi undir tunnilsloftinum, sum Landsverk í hesi løtu kannar og arbeiðir við at fáa vekk.

– Eg dugi ikki at siga, nær tunnilin letur uppaftur, men hetta kann gott taka eina løtu, sigur Hendrik Akurstein, sløkkiliðsmaður.