- Tíðindi, mentan og ítróttur
Góðan morgun Føroyar
Tá børn hava svølgt eitthvørt, tey ikki skulu, er umráðandi, at foreldur skjótast gjørligt finna útav, hvat eiturevni talan er um.
- Jú meira vit vita um tað, sum barnið hevur fingið í seg, jú lættari og skjótasri er tað hjá okkum at veita neyðugu hjálpina, sigur Absalon Eysturoy, barnalækni á Landssjúkrahúsinum.
Hóast tað ikki hendir ofta, so er tað ikki óvanligt, at børn blíva innløgd, tí tey hava fingið okkurt slag av eiturevni í seg.
- Leggur tú merki til, at barnið hevur svølgt okkurt evni, so er umráðandi at seta seg í samband við lækna sum skjótast. Tað er ikki altíð, at kroppurin hjá einum barni reagerar beinanvegin, men tað merkir ikki, at eiturevnið ikki ger skaða, sigur Absalon Eysturoy.
Hann heitir á øll foreldur og vaksin sum heild at tryggja sær, at eitt nú vesireins, uppvaskiisápa, heilivágur og annað ikki stendur í barnahædd.
- Tað er ikki altíð so lætt at viðgera eitt barn, ið hevur fingið eiturevni í seg, tí tað er ymiskt, hvussu mótgiftin riggar upp á barnið. Tí er tað sera týdningarmikið, at øll slík evni standa soleiðis, at børn ikki kunnu røkka teimum. Harafturat er tað umráðandi, at handlar og fyritøkur, ið selja slíkt, upplýsa keyparar um vandanar, ið kunnu standast av evnunum, um børn fáa tað í seg, sigur Absalon Eysturoy.
Í morgunsendingini greiddi hann frá mannagongdini, tá eitt barn hevur fingið eiturevni í seg.