Turið Hammer hevur skrivað og vart eina ph.d-ritgerð um tarmbrunasjúkur í Føroyum. Tað vísir seg, at Føroyar er tað landið í heiminum, ið hevur hægsta títtleika av tarmsjúkum. Mett verður at yvir 1.000 føroyingar hava tarmbrunasjúku. Tað er tríggjar ferðir fleiri tilburðir samanborið við okkara norðurlendsku grannar.

Djóni Nolsøe Joensen, løgtingslimur, er ein teirra, ið livir við tarmbrunasjúku. Ráðini frá Djóna eru at lata seg kanna sum skjótast, um sjúkueyðkenni vísa seg. Fyri hann hava kostvanar og rørsla gjørt, at hann bert noyðist at taka heilivág eftir tørvi.

Turið Hammer og Djóni Nolsøe Joensen vitjaðu morgunsendingina, har tey umrøddu evnið. Til ber at hoyra samrøðuna við at trýsta á pílin omanfyri.

Leygardagin 24. oktober skipar Colitis Crohn felagið í Føroyum fyri tiltakið, har tað ber til at hoyra meira um tarmbrunasjúkur - m.a. greiða fólk frá, hvussu sjúkan ávirkar teirra lív. Møguligt verður at seta teimum og fakfólki spurningar. Fyri limir er tiltakið ókeypis, men øll eru vælkomin. Tó er neyðugt at melda seg til við at senda ein teldupost á ccf@ccf.fo. Tiltakið verður í veitsluhøllini á Landssjúkrahúsinum kl. 13, leygardagin 24. oktober.