Høgni Hoydal óttast ikki kanning av uppboðssølu

Føroyski skattgjaldarin stendur til at skula gjalda fyrsta 18 milliónir krónur - og í ringasta føri upp í 60 milliónir krónur, um roynaruppboðssølan í 2017 verður tikin uppí - til Reiðarafelagið í endurgjaldi í sambandi við, at Fiskimálaráðið tapti sakarmálið móti Reiðarafelagnum í Føroya rætti.

Dómurin í Føroya Rættur staðfestir, at Fiskimálaráðið gjørdi seg inn á ein galdandi sáttmála millum reiðarar og manningarfeløg, við at lóggeva um, at manningar ikki skuldu bera sín part av kvotukeypum á royndaruppboðssøluni í 2016.

Høgni Hoydal, sum var landsstýrismaður í fiskivinnumálum, tá lógin um royndaruppboðssøluni varð samtykt, heldur, at dómurin eigur at verða skotin inn fyri hægri rætt.

Og hann óttast heldur ikki, at ein kanningarstjóri verður settur at kanna málið.

Enn er ikki greitt, um Reiðarafelagið fer at krevja endurgjald fyri, at felagið bar allan kostnaðin av kvotukeyptunum á royndaruppboðssøluni í 2016.

Tilsamans er talan um 18 milliónir krónur, sum reiðarar hava goldið ov nógv fyri tær kvotur, sum keyptar vórðu á royndaruppboðssøluni í 2016. Men um sølurnar av kvotum á royndaruppboðssøluni í 2017 eisini verða roknaðar uppí, so verður talan um 60 milliónir krónur.