Í sambandi við innsetingina av Joe Biden í farnu viku fegnaðist presturin, Theodor E. D. Olsen, um, at hóast Joe Biden altíð hevur havt avbjóðingar við staming, so heldur tað honum ikki aftur í at seta seg í forsetastólin.

Og júst staming er nakað, Theodor E. D. Olsen sjálvur kennir til.

- Eg havi ongantíð hugsað so nógv um tað, og eg havi á ongan hátt følt meg útihýstan, av tí at eg stami, sigur Theodor E. D. Olsen.

Hann dylur tó ikki fyri, at tað kann vera avbjóðandi viðhvørt.

- Tá eg eri í einum barnaføðingardegi ella í einari veitslu, har fólk tosa nógv og bróta hvønnannan av, havi eg trupult við at vera við í prátinum. Og í slíkum førum er tað irriterandi at stama, sigur Theodor E. D. Olsen, sum tó ongantíð hevur sæð stamingina sum eina forðing eitt nú í vali av útbúgving.

- Eg haldi, at tað er vigtugt, at mann lærir seg at liva við sær sjálvum, tí ein sjálvur er nokk tann persónurin, mann skal liva saman við restina av lívinum. Mann skal ikki altíð leggja so nógv í, hvat onnur siga, tí tað er ein sjálvur, sum er víðvøllurin, sigur Theodor E. D. Olsen.