Minnilutasamgonga riggar betur í etiskum málum

Samgongutingmaðurin, Johan Dahl, atkvøddi saman við andstøðuni fyri uppskotinum um at javnseta samkynd við hinskynd í barsilslógini, og við hesum breyt hann avtaluna í samgonguni um, at eingin samgongutingmaður skal atkvøða ímóti samgonguni.

Johan Dahl sigur, at ein minnilutasamgonga hevði verið betri í etiskum málum.

Bárður á Steig Nielsen, løgmaður og formaður í Sambandsflokkinum, sigur, at tað fær ongar avleiðingar fyri Johan Dahl, at hann atkvøddi saman við andstøðuni. Men løgmaður dylur ikki fyri, at samgongan hevur fingið ein undir vangan.

Jenis av Rana, formaður í Miðflokkinum, sigur, at Johan Dahl hevur víst, at hann er ikki partur av samgonguni. Samgongan kom ikki minniluta, men Sambandsflokkurin hevur ein innanhýsis trupulleika, sigur Jenis av Rana.