Starvsfólkini í Kollafirði lagt arbeiðið niður

Øll starvsfólkini á dagstovninum Kura í Kollafirði hava fyribils lagt arbeiði niður.

Starvsfólkini siga í brævi til foreldrini, at tey hava valt ikki at møta til arbeiðis í dag fyri at vísa á truplu pedagogisku støðuna á dagstovnaøkinum í løtuni, og fyri at vísa Miðstovninum í Havn stuðul.

Dagstovnaleiðarin í Kollafirði, Connie Lassen, hevur onga viðmerking til støðuna. Og tað barst eisini Jóan Peturi Hentze, trivnaðarstjóra í Tórshavnar kommunu, frá at gera samrøðu fyrrapartin.

Kommunala arbeiðsgevarafelagið, KAF, er samráðingarpartur vegna Tórshavnar kommunu, og samráðingarleiðarin hjá KAF, Anita Fuglø, sigur, at tað at starvsfólkini á dagstovninum í Kollafirði eru farin til hús, er at meta sum óheimilað stríðsstig, meðan sáttmálin framvegis er í gildi.

Hoyr samrøðu við Anitu Fuglø í útvarpstíðindunum.
 

Anita Fuglø er samráðingarleiðari hjá Kommunala arbeiðsgevarafelagnum, sum er komið upp í málið, tí KAF er sáttmálapartur hjá kommununum.