Hví flutti eitt farmaskip við stóru hvítu bókstavunum »TÓRSHAVN« á endanum, eina rúgvu av villdjórum úr Namibia á ein djóragarð hjá forsetanum í Kongo í 2015? Og hví hevur ein heilsøla í Kongo flutt einum føroyskum flutningsfelagi slakar 100 milliónir krónur á kontu í Bank Nordik?

Svarið er flutningsfelagið All Oceans Logistics, sum er skrásett at halda til í Mykinesgøtu 5 í Havn, í somu hølum sum Shipping.fo og Krúnborg.

All Ocean Logistics átti og rak farmaskipið El Niño, sum var skrásett í føroysku skipaskrásetingini, FAS. Tað var farmaskipið, sum frammanundan kallaðist SAGA. Í FAS-skipanini rindar manningin 35 prosent í skatti av bruttolønini. Skatturin verður síðan endurgoldin reiðarínum, sum rindaði lønina.

El Niño sigldi í vinnuørindum í Afrika. Og tað var eisini júst farmaskipið El Niño, sum flutti villdjórini úr Namibia til ein forvitnisligan djóragarð við framkomnum sláturvirki í Kongo, har forsetin Joseph Ka-bila var í holt við at byggja ein ferðafólkadepil.

Sama flutningsfelag, All Oceans Logistics, fekk árini frá 2013 til 2016 slakar 100 milliónir krónur frá heilsøluni EGAL, sum hevur høvuðssæti í Kinshasa, høvuðsstaðurin í Demokratiska Lýðveldinum Kongo.

Fyrsta flytingin er í oktober 2013. Tá vóru 275 túsund og 500 evrur fluttar á bankakontuna í Bank Nordik.

Og pengar fara eisini í stríðum streymi úr Kongo til Føroya árini eftir. Í alt fóru 120 milliónir krónur til Føroya.

Í Breddanum hyggja vit nærri at hvussu Føroyar ein einaferð gjørdust partur av eini hvítvask gølu.

Luttakarar: Eli Thorsteinsson, Uni Holm Johannesen og Barbara Holm.

Sendingina gjørdu John Johannesen og Arnfríð Joensen Dahl, sum eisini var redaktørur.