Landsstýrismaðurin heldur fast um tey 15 prosentini

Árni Skaale, nýggjur landdstýrismaður í fiskivinnumálum, fekk ikki nógva tíð at seta seg inn í tingini, nú boð eru eftir honum um at loyva skipum, sum fiska svartkjaft, at landa uttanlands.

Christian liggur í løtuni í Ánunum og bíðar eftir tørni. 

Men Árni Skaale, landsstýrismaður í fiskivinnumálum, fer ikki at loyva skipunum at landa meira enn tey 15 prosentini av veiðuni uttanlands, sum lógin loyvir.

Hann manglar grundgevingar fyri at broyta ásetingina.

Sambært §41 í lógini um sjófeingi kunnu fiskifør undir føroyskum flaggi landa og avreiða í mesta lagi 15% av veiðuni fyri hvørt fiskaslag sær uttanlands.

Fakfelagsformenn ymiskir á máli

Jan Højgaard, formaður í Fiskimannafelagnum, heldur, at landsstýrismaðurin eigur at loyva skipum uttanlands at landa. Tað kann hann við einari kunngerð.

Jan Højgaard hevur sent landsstýrismanninum Árna Skaale eina áheitan, men enn hevur hann ikki fingið svar

Georg Hansen, formaður í Føroya arbeiðarafelag hevur forstáilsi fyri støðuni, men hann heldur lítið um, at skipini sleppa uttanlands at landa, sigur hann.

Óli Johannesen, formaður í Fuglafjarðar arbeiðsmannafelag, sigur tað sama. Hann hevur fleiri limir hjá Havsbrún, sum liva av at skipini landa.