Misnýtsla ávirkar alla familjuna

Blái Krossur hevur í eini tíggju ár havt bólkar fyri øll í aldrinum níggju til 35 ár, sum hava rúsbundin foreldur, og fram til mikudagin 7. september ber til at tekna seg til ein bólk.

Seinasta hálvár vóru tilsamans 45 fólk við í sjey bólkum, men nú nýggir bólkar aftur skulu mannast, verða bólkarnir óivað fleiri í tali.

Alisa Hammer er fyribyrgingarleiðari hjá Bláa Krossi og leiðari fyri “Títt rúm”, og hon sigur stóran tørv vera á slíkum bólkum, sum eru skipaðir við virksemi, ið tekur støði í einstaklinginum og bólkinum sum heild.

Fyrst og fremst verður arbeitt við samrøðu, men eisini við ymiskum kreativum arbeiðshættum, so sum tekningum, uppgávum, yrkingum, spølum, filmum og øðrum.