Kvinnur ráða í Vestmanna

Vestmanna kom á Føroyakortið sum ein kvinnubygd, tá ið kvinnulistin vann kommunuvalið í 1988 og ein kvinna, Maria Hansen, sat sum borgarstjóri tvær setur.

Hetta var í ringastu krepputíð, at kvinnurnar tóku við leiðsluni í Vestmanna, men hóast tíðirnar nú eru serstakliga góðar, eru tað aftur kvinnurnar, ið hava leiðsluna í Vestmanna.

Nú Pauli Trond Petersen legði frá sær sum borgarstjóri, hevur bygdaráðið skipað seg av nýggjum. Á bygdaráðsfundi hóskvøldið varð Bjørg á Rógvi einmælt vald til borgarstjóra og Sára Jógvansdóttir til varaborgarstjóra.

Fýra av sjey bygdaráðslimum eru kvinnur, umframt at kvinnur manna tungu sessirnir i umsitingini, so sum fíggjarstjóra- og kommunuskrivarasessin. Og kvinnur standa á odda fyri øllum nevndunum í bygdaráðnum uttan einari.

– Tað at kvinnur nú mynda Vestmanna kommunu kemur at merkjast sigur nýggi borgarstjórin, Bjørg á Rógvi, sum longu er farin í gongd í starvinum, hon hevur røkt síðstu tveir mánaðirnar, meðan undanmaðurin hevur verið í farloyvi.