Ótrúligt at sláa Ferencvaros út

KÍ gjørdi í gjárkvøldið ikki mætari enn at senda ungarska stórfelagið Ferencvaros út úr Champions League-kappingini – og tað enntá á útivølli.

Longu í hálvleikinum var 3-0 til KÍ, og soleiðis endaði dysturin eisini. KÍ var í veruleikanum nærri at vinna 4-0, enn Ferencvaros var at minka um munin.

– Ímóti endanum á dystinum klappaðu áskoðararnir hjá teimum, hvørja ferð vit nurtu við bóltin, men ýldu eftir sínum egnu. Og aftaná fagnaðu teir okkum stórliga, sigur Árni Frederiksberg, sum var tvímálsskjútti hjá KÍ.

Venjarin fekk sekkin
– Tá ið vit fingu Ferencvaros í lutakastinum, sá eg tað sum eina uppliving at fáa, men nú hava vit sligið teir út. Hetta er heilt fantastiskt, heldur Árni.

KÍ er nú á veg heimaftur til Føroya, og skal nú fyrireika seg at møta svenska meistaraliðnum, BK Häcken, í øðrum umfari í Champions League.

Russiski venjarin hjá Ferencvaros, Stanisláv Tjertjesov, er eisini á veg heim. Hann fekk sekkin eftir tapið í gjárkvøldið.