Bispur: Kæran kann koma kærarunum aftur um brekku

Hoyr samrøðu, við Jógvan Fríðriksson, bisp, sum heldur, at kirkjan er í kreppu, tí fimm prestar hava kært bisp til Almanna- og mentamálaráðið, tí teir eru ónøgdir við setanartilgongdina og avgerðina, tá Ovi Brim varð settur í nýtt starv sum próstur.

Teir halda, at bispur áðrenn sjálva setanartilgongdina longu hevði gjørt av, at tað skuldi vera Ovi Brim, ið fekk starvið.

Teir finnast at ymsum viðurskiftum í kæru síni til Almanna- og mentamálaráðið. Men hóast ráðið staðfestir avgerðina, um at seta Ova Brim, so gevur ráðið kærarunum rætt í, at tað var skeivt av bispi, at boðað frá, at Ovi Brim fór at fáa starvið, áðrenn Sirið Stenberg, sum er endaligur setanarmyndugleiki, hevði tikið støðu til tilmælið frá bispi.

Almanna- og mentamálaráðið hevur í skjølunum, sum Kringvarpið hevur fingið, strikað nøvnini á teimum fimm prestunum, sum hava kært.