Í sendingini hoyra vit upptøkur og tvær samrøður frá tiltakinum "Orð og tónar" á Reinsarínum í Havn tann 24. septembur í ár.

Rakul í Gerðinum tosar fyrst við rithøvundin Arnbjørn Dalsgarð um nýggja stuttsøgusavnið "Kann eg verða títt barn".

Søgurnar fevna um bæði realismu og surrealismu og eru ikki altíð, sum mann heldur. Tað, sum fyrst tykist eyðsæð, kann vísa seg at vera nakað heilt annað. 

Í samrøðuni greiðir Arnbjørn frá, hvussu hann við realismu og surrealismu kannar menniskjalig sambond, leiklut mansins, samkyndan kærleika og ávirkanina frá tøkni og vitlíki.

Hann metir eisini um støðuna hjá føroyskum bókmentum í dag og fegnast um týðingar og barnabøkur, men eftirlýsir fleiri skaldsøgur og betri arbeiðsumstøður hjá rithøvundum og forløgum í tí sambandi.

Tann seinna samrøðan er við listamannin Bárð Jákupsson og Kinnu Poulsen, sum hevur samskipa og lutvíst skriva nýggju bókina "Lendið". Bókin lýsir týdningin hjá Bárði sum listamálara, rithøvund, listamiðlara og stuðul hjá yngri føroyskum listafólkum. 

Bárður greiðir frá, hvussu føroyska landslagið, barndómsminni og ferðir við pápanum hava myndað list hansara. Eisini verður tosað um arbeiðið við barnabókum, menningina av føroyskum listamáli og týdningin av at bera upplivingar víðari til onnur. 

Uni Holm Johannesen ger samrøðuna við Bárð Jákupsson og Kinnu Poulsen.