Hvat hendir, tá tónleikurin í eini skaldsøgu sleppur út úr bókini og fer at liva sítt egna lív á palli. Tað hevur danska fólkatónleikatrioin Dreamers' Circus sett sær fyri at kanna við nýggju útgávuni The Lost Musicians. Útgávan er sprottin úr samstarvinum við dansikompaníið Aaben Dans og úr hugtakandi skaldsøguni Glataðu spælimenninir, sum William Heinesen gav út í 1950.
Tað, sum upprunaliga varð skrivað til eina dansiframførslu, har tónleikur og rørsla runnu saman, er nú vorðið til eina sjálvstøðuga tónleikaútgávu.
Her verður lurtarin drigin inn í ein heim, sum skiftir millum tað dreymakenda, tað myrka, tað leikandi og tað inniliga.
Tónleikurin hjá Dreamers' Circus flættar norðurlendskan fólkatónleik, klassiskan tónleik og improvisatión saman, meðan røddin hjá føroyska sjónleikaranum Olaf Johannessen ber brot úr tekstinum hjá Heinesen fram og gevur tónunum eina frásøgurødd.
Í miðdeplinum stendur Rune Tonsgaard Sørensen, violinleikari í trioini, sum við The Lost Musicians er farin undir eina øðrvísi tónlistarliga ferð. Men hóast Dreamers' Circus er danskur bólkur, eru eisini føroysk bond í tónleikinum og í søguni hjá Rúna sjálvum, hann hevur nevnuliga føroysk ættarbond og vitjar eisini her javnan.
Í sendingini práta vit við Rune Tonsgaard Sørensen um, hvussu William Heinesen og Tórshavn í skaldsøguni hava kveikt tónleikin, um leiðina frá dansipalli til plátuútgávu og um føroysku bakgrundina, sum er ein partur av hansara tónlistarliga samleika.
Ragnar A. Jacobsen hevur lagt til rættis