Søkja eftir manning til avloysaraskipið

Strandferðslan søkir nú eftir stýrimanni og maskinmeistara til nýggja avloysaraskipið, sum stendur í gerð í Noregi.

Stýrimaðurin og maskinmeistarin skulu verða partur av nýggju manningini á tríkiljuni, og ætlanin er, at teir skulu fara til Noregs í januar at hava ábyrgd av at fylgja og hava eftirlit við byggingini.

Stýrimaðurin og maskinmeistarin skulu eisini fáa upplæring at sigla tríkiljuna.

Freistin at søkja størvini er 3. januar á middegi.

Tríkiljan skal røkja farleiðir hjá strandferðsluni, tá onnur skip m.a. eru á sleipistøð.

Hon hevur nýggjastu grønu tøknina, og kann sigla við bæði gassolju og battarí.

Nýggja avloysaraskipið verður eftir ætlan liðugt í mai næsta ár.