Politiið kannar innbrot

Tað eina innbrotið var í Keypsamtøkuni í Miðvági. Har hava innbrotstjóvarnir verið eftir vekslipengunum, sum vóru í kassunum.

Hitt innbrotið var í Atlantis í Klaksvík. Har hava innbrotstjóvarnir tikið sær góðgæti úr kioskini.

Bæði málini vera nú kannað.

Annars sigur politiið, at friðarligt hevur verið í býnum í nátt, eftir at sera nógv fólk vóru í býnum annað jólakvøld. 

Nakað av vindi var í gjár. Hetta elvdi til, at nakrar leysar takplátur fóru á flog í Hoyvík.

Eisini í vesturbýnum í Havn gjørdi vindurin um seg. Har fór nakað av leysum byggitilfari á flog, sigur politiið.

Einki frættist um vindskaðar aðrastaðni í landinum, hóast vindurin var nógvur. Á Fámjinsvegnum vóru hvirlurnar upp í 44 metrar um sekundið. Hetta gjørdi, at Bygdaleiðir avlýstu koyringina í Suðuroynni í gjár.