Jarðir vil einki siga um innkrevjingarskipan

Bóndafelagið og Óðalsfelagið vilja í løtuni einki siga um ta nýggju innkrevjingarskipanina fyri gongd í haga, sum feløgini arbeiða við.

Bóndafelagið og Óðalsfelagið eiga smápartafelagið Jarðir, sum er stovnað fyri at verja áhugamálini hjá teimum, sum varða av jørðini í Føroyum.

Endamál felagsins er at eiga og reka fasta ogn, ferðavinnu, handil o.a. virksemi í tí sambandi. 

Fáa ov lítið burturúr

Bóndafelagið og Óðalsfelagið hava fleiri ferðir boðað frá, at tey, sum varða av náttúruni, fáa ov lítið burturúr. Og tað skal smápartafelagið Jarðir bøta um.

Fundur var í felagnum í gjár. 

Men tað einasta, sum nevndarformaðurin Niels Pedersen vil siga í dag er, at arbeitt verður framvegis við eini felags innkrevjingarskipan á einari og somu heimasíðu.

Okkurt nýtt í næstu viku

Sambært Niels Pedersen er arbeiðið tó komið so mikið langt, at smápartafelagið Jarðir kann greiða nærri frá tí fyrst í næstu viku.

Við útvarpið í morgun segði Jóhan Pauli Helgason, leiðari á menningardeildini hjá Visit Faroe Islands, at tá bøndur og jarðareigarar seta gjald á sína jørð, siga teir seg ofta gera hetta fyri at verja náttúruna.

Men tað er sjáldan, at inntøkurnar verða brúktar til verndarátøk:

Niels Pedersen, formaður í Óðalsfelagnum og nevndarformaður í smápartafelagnum Jarðir, hevur í løtuni onga viðmerking til útsøgnina hjá leiðaranum á menningardeildini hjá Visit Faroe Islands.