Eysturoyartunnilin kann verða seinkaður

Eysturoyartunnilin skal eftir ætlan verða klárur at taka í brúk í desember í ár, men í løtuni er óvist, um arbeiðið fer at halda tíðarætlanina. 

Teitur Samuelsen, stjóri í partafelagnum Eystur- og Sandoyartunlar, sigur, at enn er ov tíðliga at staðfesta, um arbeiðið verður liðugt til ásetta tíð, men hann ásannar, at tíðarætlanin er knøpp. 

Tað er serliga arbeiðið at tetta lekar í tunlinum, ið krevur meira tíð enn upprunaliga mett.

Tað seinkar onnur arbeiði, ið ikki kunnu gerast, fyrr enn liðugt er at tetta lekarnar.

Arbeiðið at gera Eysturoyartunnilin byrjaði í 2016, og tunnilin fer at stytta farleiðina millum Havnina og Skálafjørðin munandi.