SAS gevst nú eisini at flúgva til Kina

Fleiri stór flogfeløg eru fyribils givin at flúgva til Kina, og í dag boðar SAS frá, at felagið fer ikki at flúgva aftur til Beijing og Shanghai í februar.

Orsøkin er coronavirusið, sum tók seg upp í Kina fyri einum góðum mánaði síðani. Felagið fer ikki at selja ferðaseðlar til býirnar aftur fyrr enn hálvan mars.

Fólk, sum hava keypt ferðaseðil, kunnu annaðhvørt fáa pengarnar aftur, ella kunnu broyta ferðina, upplýsir felagið.

12 ferðir um vikuna

Vanliga flýgur SAS 12 ferðir um vikuna til  Beijing og Shanghai. Flúgvingin til Hongkong heldur tó fram sum vanligt, sigur felagið.

Fleiri onnur flogfeløg eru eisini givin at flúgva til Kina, og í gjár boðaði Lufthansa frá, at felagið ikki fer at flúgva til Kina í februar.

Eisini British Airways, United Airline, American Airlines, KLM, Air France og Turkish Airlines eru givin at flúgva til Kina fyribils, skrivar Ritzau.