Hasfjord á veg til Føroya

Hasfjord, sum Strandfaraskip landins hava keypt í Noregi, er nú á veg til Føroya. Sambært heimasíðuni vesselfinder.com verður Hasfjord í Havn hóskvøldið klokkan tíggju. 

Skipið siglir nú suður við norsku strondini.

Strandfaraskip landsins keyptu Hasfjord hálvan desember í fjør. Skipið er síðani umvælt á Slipen verksted í Sandnessjøen.

Hasfjord skal sigla við tungum akførum og farmi í Skopunarfirði.

Bygt í 1975

Skipið tekur eisini 12 ferðafólk. Tað er bygt í Noregi í 1975.

Løgtingið hevur játtað 10 mió. kr. til at keypa Hasfjord fyri.

Skipið er 40,7 metrar langt. Til samanberingar kann nevnast, at Teistin er 40 metrar langur, og Ternan er næstan 41 metrar long.

Hasfjord varðveitir navnið, nú skipið er vorðið føroyskt.