Breddin: Sjúkrahúsleiðsla og corona-tilbúgving

Kaj Leo Holm Johannesen, landsstýrismaður í heilsumálum, endaði brádliga í einum politiskum ódnarveðri í gjár, tá fleiri samgongu- og andstøðufólk eina løtu funnu felags stev í fordømingini av eini tekniskari tillaging í almennu leiðslukunningarskipanini og roknskapargóðkenningarskipanini í sjúkrahúsverkinum.

Tillagingin hevði ta avleiðing, at stjórarnir á Klaksvíkar og Suðuroyar sjúkrahúsi skuldu lata tilmæli um roknskapir til Steinar Eirikstoft, forstjóra í sjúkrahúsverkinum, ið síðani skuldi avgreiða tað við aðalstjóran.

Og brádliga stóð landsstýrismaðurin fyri skotum. Sjúkrahússtjórar, tingfólk og onkrir miðlar tulkaðu hetta sum ein lið at taka tey smærru sjúkrahúsini av, og kravdu, at landsstýrismaðurin ógildaði avgerðina. 

Men eftir stendur, at løgtingið hevur samtykt at skipa sjúkrahúsini í eitt sjúkrahúsverk við einum stjóra yvir hinum.

Í Breddanum verður hugt, hvat endamálið er við hesum stjóra, hvørjar heimildir viðkomandi hevur, og hvat hann er avmarkaður til.

Coronavirus

Eru Føroyar til reiðar, um COVID-19-virusið kemur til landið.

Samstundis boðar WHO, alheims heilsustovnurin, nú frá, at ábendingar eru um, at COVID-19-virusið, ið er almenna heitið á Coronavirusinum, møguliga er í minking.

Fráboðanin er grundað á kinesiskar dátur um 44.000 fólk, har COVID-19 er staðfest, og vísir, at 80 prosent av teimum eru sloppin við mildum sjúkueyðkennum.

Í Breddanum verður hugt at, hvussu sjúkan hevur breitt seg, og um Føroyar eru til reiðar, um sjúkan verður staðfest her á landi.

Breddin í útvarpinum í dag klokkan 17.05