Trump brúkar fýra milliónir til konsulát í Nuuk

Amerikanski forsetin, Donald Trump, hevur sett góðar fýra milliónir krónur av til eitt amerikanskt konsulát í Nuuk í Grønlandi.

Tað skrivar miðilin, Politico, sambært Ritzau.

Hetta verður tó ikki fyrsta amerikanska konsulátið í Grønlandi. 

Í 1940 læt USA upp konsulát í Grønlandi, eftir at Týskland hevði hersett Danmark. Konsulátið læt aftur í 1953.

Ætlanin góðkend

Í desember í fjør upplýsti danska uttanríkisráðið, at tað hevði góðtikið ætlaninar hjá USA um konsulát í Nuuk.

Sambært Politico verður stjórnaruppskotið helst góðtkent  í Kongressini, tí Grønland hevur stóran strategiskan týdning fyri USA. 

Sambært AP-tíðindastovuni, skulu sjey fólk arbeiða á konsulátinum, og tað letur eftir ætlan upp í ár, skrivar Ritzau.