Semingsmenninir hitta KAF og heilsuhjálparar í dag

Seinnapartin í dag fara semingsmenninir at tosa við Kommunala arbeiðsgevarafelagið og Heilsuhjálparafelagið. 

Partarnir hava samráðst um nýggjan sáttmála síðani oktober í fjør.

Men fríggjadagin helt Kommunala arbeiðsgevarafelagið, at ov langt var millum partarnar til, at teir megnaðu at finna semju sjálvir, hóast átta samráðingarfundir hava verið. Felagið vildi tí hava Semingsstovnin uppí.

KAF og Maskinmeistarafelagið

Kommunala Arbeiðsgevarafelagið og Maskinmeistarafelagið handaðu hvør øðrum sáttmálakrøv í gjár.

Sáttmálin, ið fevnir um maskinmeistarar í starvi hjá SEV og IRF, fór úr gildi 1. oktober í fjør.

Samráðingarleiðari hjá Maskinmeistarafelagnum er Ólavur Gunnarsson, formaður, og hjá Kommunala arbeiðsgevarafelagnum er Anita Fuglø samráðingarleiðari

Partarnir fara nú hvør í sínum lagi at viðgera krøvini, og teir hittast aftur 11. mars.