Ruddar høvini fyri plast

Um 20 ár skulu heimsins høv vera ruddað fyri alt plast. Tað er stórbæra málið hjá felagsskapinum The Ocean Cleanup.

Tað er kortini ikki bara sum at siga tað, tí sambært felagsskapinum eru umleið fimm billiónir stykkir av plastruski í høvunum í dag.

Og hetta plasti samlar seg serliga í fimm støðum kring heimin, harav tað kendasta er plasthavið í Kyrrahavinum, ið liggur miðskeiðis millum Hawaii og California.

Og fyri at savna alt hetta plastið, hevur felagsskapurin ment ymiskar tøkni og útgerð, umframt at ment samstarv við fleiri av heimsins leiðandi feløg innan ymisk økir. Eitt teirra er danska reiðaríið Mærsk, ið útvegar skip til endamálið.

Uppgávan hjá Mærsk er millum annað at frakta nakrar flótandi skipanir út á hav, ið flóta við streyminum sum falskar strandarlinjur, og á tann hátt savna plast. Við hesi tøknini vónar felagsskapurin, at tað fer at eydnast at beina fyri 50 prosent av øllum plastinum í Kyrrahavinum innan fimm ár.

Fyri Mærsk er tað skipið Mærsk Transporter og manningin umborð, ið er partur av arbeiðinum at rudda upp í heimsins høvum. Fleiri føroyingar eru eisin umborð á Mærsk Transporter, og er ein teirra føroyingurin Jón Simonsen, ið er skipari umborð.