Útseta mvg og víðka dagpengalógina

Til tess at bøta um gjaldførið hjá fyritøkum í hesum tíðum, verður avrokningin fyri meirvirðisgjald fyrsta ársfjórðing útsett til annan ársfjórðing. Á tann hátt verður gjaldførið hjá vinnuni styrkt einar 400 milliónir kr. næstu mánaðirnar.

Hetta er eitt av átøkunum, sum landsstýrið fer at seta í verk.

Dagpengalógin verður víðkað til eisini at fevna um løntakarar og sjálvstøðug vinnurekandi, sum eru sett í sóttarhald, ella sjálvboðin eru farin í sóttarhald. Eftirgoldið verður tó ikki fyri starvsfólk, ið kunnu arbeiða heima við hús.

Landskassin ber kostnaðin av hesum átakinum.

Ískoyti og veðhald

Løntakarar kunnu fáa arbeiðsloyisstuðul sum eitt ískoyti, verður neyðugt hjá arbeiðsgevara at seta starvsfólk niður í tíð. ALS ber henda kostnaðin.

Eisini verður ein veðhaldsskipan fyri rakstrarfígging. Hetta er ein serlig ríkisgarantiskipan, sum tryggjar smáum og miðalstórum fyritøkum í ríkisfelagsskapinum nøktandi atgongd til rakstrarfígging.

Danski vakstrargrunnurin fíggjar hesa skipanina.