Russland: Grundlógin broytt í skundi

Russland hevur tikið eitt stig aftrat, sum ber í sær, at Valdimir Putin kann stilla uppaftur til forsetavalið í 2024.

Í gjár góðkendi russiski grundlógardómstólurin, at tey fýra valskeiðini, hann hevur verið forseti, skulu ikki telja við longur, og tí verður byrjað av nýggjum.

Mótstøðufólk hjá Putin siga, at hetta er einki annað enn statskvett. Viðhaldsfólk siga hinvegin, at avgerðin ger støðuna í Russlandi tryggari.

Avgreitt í skundi

Grundlógarbroytingin er framd í stórum skundi.

Mikudagin atkvøddi yvirhúsið í russiska tinginum fyri broytingini, leygardagin skrivaði Putin undir uppskotið, og í gjár varð lógin góðkend í grundlógardómstólinum.

Nú er bara eftir at spyrja fólkið. Eftir ætlan verður fólkaatkvøða 22. apríl.

Sleppa ikki at mótmæla

Andstøðan hevur biðið um loyvi at skipa fyri mótmælistiltøkum móti grundlógarbroytingini, men myndugleikarnir sýta fyri hesum. Teir vísa til trygdartiltøkini, sum eru sett í verk í sambandi við coronasmittuna.

Borgarstjórin í Moskva hevur sett forboð fyri, at meira enn 50 fólk kunnu savnast í senn.