Corona í Ísrael: Elta smittað á fartelefonini

Ísraelska stjórnin hevur góðtikið, at myndugleikarnir kunnu elta slóðir eftir fartelefonir hjá fólki, sum annaðhvørt eru smittað av coronavirusi, ella eru undir illgruna fyri at verða smittað.

Hetta er ein háttur, sum Ísrael fyrst og fremst brúkar í stríðnum móti yvirgangi, skrivar The Guardian.

Allir ráðharrarnir í stjórnini tóku undir við uppskotinum hjá Benjamin Netanyahu, forsætisráðharra.

Netanyahu sigur, at fyribilslógin hevur til endamáls at tryggja, at myndugleikarnir kunnu geva fólki boð, sum eru smittað, og seta tey í sóttarhald.

Ísrelski forsætisráðharrin segði í einari sjónvarpaðari røðu til tjóðina, at lógin verður í gildi í 30 dagar.

- Ísrael er eitt fólkaræði, og vit skulu halda javnvágina millum borgararættindi og tað, samfelagið hevur brúkt fyri. Hesi amboðini fara at hjálpa okkum at finna tey sjúkau, og forða virusinum at breiða seg, segði hann.