Hjálparpakkin samtyktur

Frammanundan var einki ivamál um, at hjálparpakkin bleiv samtyktur, tí allir flokkar á tingi vóru kunnaðir um uppskotið og høvdu tikið undir við tí.

Og løgtingsformaðurin brúkti eisini høvi at takka flokkunum í samgonguni og andstøðuni fyri, at tað bar til at avgreiða málið so skjótt.

Skert ting

Eins og restina av samfelagnum var tingfundurin í dag merktur av avmarkingum í samband við korona.

Tingið var skert, so einans 19 tingfólk møttu í dag, og tey sum vóru møtt, tóku tørn at atkvøða í tingsalinum.

Hetta fyri, at tað ikki skuldu vera ov nógv fólk inni í salinum samstundis.

Trý uppskot í einum

Hjálparpakkin er skrúvaður saman av trimum lógaruppskotum, hvørs endamál eru at veita ískoyti til niðursetta arbeiðstíð, endurrindan av løn undir sjúku, tiltøk at bøta um likviditetin hjá fyritøkum og garantiskipan fyri rakstrarfígging til fyritøkur.

Harumframt samtykti løgtingið at bíða við at viðgera játtanarkarmarnar til seinni í ár.