Grønlendskur hjálparpakki fyri hálva milliard

Koronavirusið hóttir fjórðahvørt virki í Suðurgrønlandi, vísir ein kanning, sum er gjørd av støðuni hjá 39 virkjum í økinum, skrivar KNR..

Tí hava grønlendsku myndugleikarnir samtykt at hjálpa til, so fyritøkurnar koma ígjøgnum kreppuna.

50 milliónir kr skulu nýtast til at hjálpa sjálvstøðugum vinnurekandi, 100 milliónir kr. skulu hjálpa fiskivinnuni, flutningsvinnuni og byggivinnuni.

107 milliónir kr. skulu nýtast til fólk. sum verða send til hús, fyri at sleppa undan at tey verða søgd úr starvi, og so hava myndugleikarnir ætlanir um at útseta skattir og avgjøld til landskassan fyri 250 milliónir kr.

Tað er Innovation South Greenland, sum hevur gjørt kanningina, og roknað verður við, at um gongdin heldur fram, so fara minst 150 fólk at missa arbeiðið í summar, og fyritøkurnar fara at missa 1,5 milliónir kr av umsetninginum.

Roknað verður við, at átøkini hjá grønlendska landsstýrinum fara at kosta um eina hálva milliard kr., skrivar KNR.