Krepputiltøkini hjá Atlantsflog standa við

Krepputiltøkini, sum Atlantsflog setti í verk 20. mars, standa fyribils við.

Tað sigur Niels Mortensen, nevndarformaður í almenna flogfelagnum.

Fríggjadagin 20. mars sendi Atlantsflog umleið 180 fólk inn í serskipanina hjá ALS. 

Tá var at kalla øll flúgving longu hildin uppat, og síðani hevur Atlantsflog bara flogið tríggjar túrar um vikuna millum Vágar og Keypmannahavn. 

Krepputiltøkini, sum vóru sett í verk fyri at tryggja haldføri og framtíðarvirksemið hjá felagnum, vóru í fyrstu atløgu galdandi til 30. apríl.

Niels Mortensen sigur við Kringvarpið, at nevnd og leiðsla í Atlantsflog meta um støðuna alla tíðina, og væntandi kemur ein fráboðan frá felagnum um eina viku ella tvær. 

Á tíðindafundi hósdagin vóru boðini frá løgmanni, at Føroyar ynskja ikki ferðafólk fyri 30.juni. Og samstundis er tilmæli, at øll sum koma til Føroya, skulu í sóttarhald í tvær vikur.

Fyri Atlantsflog merkir hetta, at neyvan verður stórvegis flúgving, hvørki í mai ella juni, staðfestir Niels Mortensen.