Tryggingarfeløg fáa longda freist

Landsstýrismaðurin í umhvørvis- og vinnumálum hevur sett í gildi kunngerð um at víkja frá skyldum hjá fyritøkum á økinum hjá Tryggingareftirlitinum, í sambandi við COVID-19.

Nýggja kunngerðin loyvir tryggingarfeløgum, tvørgangandi eftirlønargrunnum og P/F LÍV, lívs- og pensiónstryggingarfelag, at lata inn ársfrásøgn fyri 2019 í seinasta lagi 31. juli í ár. Sambært lógini skal ársfrásøgnin annars latast inn í seinasta lagi fýra mánaðir eftir, at roknskaparárið er endað.

Tó skal tann av nevndini góðkenda ársfrásøgnin verða latin Tryggingareftirlitinum í seinasta lagi 30. apríl í ár.

Men í nýggju kunngerðini verður eisini staðfest, at fyritøkur skulu senda Tryggingareftirlitinum ársfrásøgnina uttan ógrundaðan steðg eftir góðkenning á aðalfundinum.

Kunngerðin er komin í gildi, og fer úr gildi aftur 1. januar 2021.