Málið hevur ikki bráðskund

Landsstýrið greinar í løtuni, um tørvur er at leggja uppí við lóg, sum forðar útlendingum at keypa hús og jørð í Føroyum. Men í løtuni bendir einki á, at tað hevur bráðskund, sigur løgmaður.

Bárður á Steig Nielsen sigur, at upplýsingar frá tinglesingini og meklarum, vísa, at tey, sum hava áhuga at keypa fasta ogn, eru persónar, sum hava tilknýti til Føroya, tí teir hava føroyskt p-tal.

Kannað verður eisini, hvat grannlondini gera á hesum øki.

Tá greiningin er liðug, verður støða tikin til, um tiltøk skulu setast í verk. Og verður gjørt av at gera lóg á hesum øki, kemur uppskotið í heyst ella næsta ár, sigur løgmaður.

Hoyr samrøðu, sum Solby Christiansdóttir gjørdi við Bárð á Steig Nielsen, løgmann, í útvarpstíðindunum.