Samfelagstænastu í 60 tímar og missir koyrikortið

50 daga treytaða fongsulsrevsing fekk ein maður, sum varð ákærdur fyri at royna at fremja serligan ráan og vandamiklan harðskap.

Hann er tó ikki dømdur fyri hesa royndina. Men hann er dømdur fyri at koma einum øðrum í lívsvanda ella í vanda fyri at blíva skaddur.   

Maðurin skal eisini gera samfelagstænastu í 60 tímar. Og hann missir koyrikortið í eitt ár. Hann skal rinda 4.000 kr. í sekt og sakarmálskostnaðin.

Dómur fall í Føroya rætti í dag. 

Noktaði seg sekan í rættinum

Ein maður í tríatiárunum er dømdur fyri at hava roynt at koyrt á ein annan mann, sum stóð á einari gongubreyt í Klaksvik í fjør summar.

Hann rakti ikki mannin, men fór so úr bilinum og legði á hann, tók um hálsin á honum, sigur dómurin. Órættaði datt og skurslaði seg.

Maðurin er eisini dømdur fyri at hava brotið ferðslulógina, tí hann koyrdi skilaleyst í Suðuroynni.

Maðurin noktaði seg sekan í rættinum.