Hava tikið stevningina aftur

Reiðaríið hjá Ennibergi hevur tikið aftur stevningina móti Fiskimálaráðnum.

Enniberg stevndi í desember 2017.

Tað var beint áðrenn løgtingið hevði triðju viðgerð um lógaruppskotið um sjófeingi, sum Høgni Hoydal, ið tá var landsstýrismaður í fiskivinnumálum, legði fram.

Nú er tann lógin farin úr gildi aftur, og ein onnur er komin.

Kravdu 7,4 mió. kr.

Enniberg sigur í stevningini, at Fiskimálaráðið hevði ongan rætt til at taka tíggju prosent av kvotunum í Barentshavinum og selja tær á uppboðssølu, hvørki í 2016 ella í 2017.

Og Fiskimálaráðið hevur heldur ikki rætt til at ognartaka allar kvoturnar í Barentshavinum, fyri síðani at luta part av teimum út aftur til tey reiðarí, sum hava fiskað í Barentshavinum í fleiri áratíggju. 

Eitt so stórt inntriv í virksemið hjá reiðaríunum kann ikki gerast, uttan at boðað verður frá 25 ár frammanundan.

Enniberg hevði eisini krav um endurgjald, 7,4 mió. kr.