Dátueftirlitið gevur Thetis grønt ljós at kanna

Dátueftirlitið hevur nú góðkent, at smápartafelagið Thetis kannar ferðandi í Vágum fyri koronu.

Tað váttar Eyðhild Skaalum, stjóri á Dátueftirlitinum, fyri Kringvarpinum.

Heilsumálaráðið hevur gjørt avtalu við smápartafelagið Thetis um at standa fyri hesum kanningum.

Avtalan var undirskrivað mikudagin 24. juni.

Í avtaluni stendur, at Thetis ger kanningarnar fyri heilsuverkið. Tað merkir, at tað er Heilsuverk Føroya, Deildin fyri arbeiðs- og almennaheilsu, sum er dátuábyrgdari. At Thetis fremur kanningarnar í verki merkir, at Thetis er dátuviðgeri. Og tí er tað smápartafelagið Thetis, sum viðger persónsupplýsingar vegna Deildina fyri arbeiðs- og almannaheilsu.

Dátueftirlitið skuldi meta um fysisku-, fyrisitingarligu- og tøkniligu trygdina í tí, sum verður gjørt, og um heimildargrundarlagið er í lagi.

Dátueftirlitið fekk umsóknina í vikuni, og nakað av tilfarinum kom ikki fyrr enn í gjárkvøldi. Í sáttmálanum millum Heilsumálaráðið og smápartafelagið Thetis stendur, at hann kemur ikki í gildi, áðrenn góðkenning er fingin til vega frá Dátueftirlitinum til verkætlanina.

Landsstýrið boðaði annars frá, at frá í dag at rokna skulu øll ferðandi til Føroya kannast fyri koronusmmittuna. 

Men heimildin var ikki komin uppá pláss, tá fyrsta flogfarið lendi í Vágum, klokkan 13:54 seinnapartin.