Í hernað móti happing í skúlanum

Nú verður farið í hernað móti happingini í fólkaskúlanum.

Í ískoytinum til røðuna hjá løgmanni í gjár stendur, at landsstýrið hevur sett av pengar til átøk, sum skulu minka happingina og økja trivnaðin í fólkaskúlunum. 

Ein trivnaðarkanning, sum varð gjørd í fjør, vísti, at 11 prosent av næmingunum í fólkaskúlanum kenna seg happaðar. Tað er nakað minni enn í 2007, tá fyrsta slíka kanningin varð gjørd.

Trivnaðarvegleiðari

Ætlanin er millum annað at seta trivnaðarvegleiðari fulla tíð á Námi, gera trivnaðarkanningar hvørt ár, hava anti-happingardag hvørt ár, og skúlar kunnu søkja um eyka tímar til at gera kanningar ella onnur átøk.

Endamálið er ein nullhugsjón, tá ræður um happing í fólkaskúlanum.